Ёс зүйн боловсролын үндсэн агуулгад хувь хүний өдөр тутмын амьдралын ёс жаяг, иргэний ёс зүй, гэр бүлийн ёс зүй, нийгмийн харилцааны ёс зүйн асуудлуудыг судлуулахдаа монгол ёс зүйн мэдлэг ухаанаас түлхүү зааж сургах нь илүү үр өгөөжтэй байх болно.Тухайлбал, ёс зүйтэй, эрүүл зөв зан ааштай хүнийг төлөвшүүлэх, сэтгэлийн хаттай болгох, хүн чанартай болгох, ажил хөдөлмөрийг нэр төрийн хэрэг гэж бодох, залхуурахыг ичгүүртэй хэрэг гэж тэвчих, ачийг ачаар хариулах, нийгмийн ажил хэрэгт идэвхтэй оролцох, хамт олныхоо төлөө сайн зүйл хийх, найз нөхөддөө зовсон үед нь туслах, нийгмийн дэг журам сахих, аливаа юманд сэтгэлээсээ хандах, өрөвч, эелдэг байх, итгэл, нөхөрлөл, бие биедээ туслах, хүнийг хүндэтгэх, талархах, даруу байх, хүлээцтэй хандах, байгаль орчинг хамгаалах үндэснийхээ баялаг уламжлалаас суралцах хэрэгтэй байна.